Մուտքի ներգաղթային արտոնագրերի կիրառումը
ԱՄՆ մուտք գործելը
Ստանալով մուտքի ներգաղթային արտոնագիր դուք որոշակի ժամանակահատվածում պարտավոր եք մուտք գործել ԱՄՆ: Այս ժամանակահատվածը հայտնի է որպես արտոնագրի վավերականության ժամկետ: Մուտքի ներգաղթային արտոնագրի վրա “IV issue date” նշման դիմաց գրվում է թողարկման ամսաթիվը, իսկ “IV expires on” նշման դիմաց դրվում է արտոնագրի գործողության ժամկետը լրանալու ամսաթիվը: Մուտքի ներգաղթային արտոնագրի վրա “IV Category” նշման դիմաց գրվում է արտոնագրի տեսակը:
Գրին քարտի ստացումը
Մուտքի ներգաղթային արտոնագրով ԱՄՆ մուտք գործելով դուք անմիջապես համարվում եք մշտական օրինական բնակիչ: Իսկ ԱՄՆ մուտք գործելուց հետո մի քանի շաբաթվա ընթացքում մուտքի ներգաղթային արտոնագրի դիմումի մեջ նշած Ձեր ամերիկյան հասցեին փոստով կուղարկվի Ձեր օտարերկրացու գրանցման I-551 քարտը (հայտնի է որպես գրին քարտ): Այնուհանդերձ, Ձեր մուտքի ներգաղթային արտոնագիրն` իր համապատասխան մակագրությամբ, մինչև մեկ տարի կարող է ծառայել որպես մշտական բանկությունը հաստատող ժամանակավոր փաստաթուղթ: Անհրաժեշտության դեպքում նախքան գրին քարտ ստանալը դուք կարող եք մեկնել ԱՄՆ-ից` օգտագործելով Ձեր մուտքի ներգաղթային արտոնագիրը որպես մշտական բնակչի կարգավիճակը հաստատող փաստաթուղթ: Ներգաղթային մուտքի արտոնագրով ԱՄՆ մուտք գործելուց մեկ տարի հետո մշտական օրինական բնակիչները ԱՄՆ-ից մեկնելու ու ԱՄՆ ժամանելու համար պարտադիր պետք է ներկայացնեն իրենց գրին քարտն ու օտարերկրյա անձնագիրը:
Տեղեկություններ կապված սոցիալական ապահովության հետ
Մուտքի ներգաղթային արտոնագրի դիմումի հետ միասին պետք է դիմել նաև սոցիալական ապահովության համարանիշի համար: Սոցիալական ապահովության համարանիշերը տրվում են սոցիալական ապահովության վարչության կողմից ԱՄՆ-ում և այդ համարանիշը պահանջվում է բոլոր պաշտոնական պետական ու աշխատանքային հարաբերությունների հետ կապված հարցերում: Սոցիալական համարանիշը անձի նույնականացման եզակի թիվ է, որը պետք է ներկայացվի պահանջվելու դեպքում: Սոցիալական ապահովության համարանիշի ու սոցիալական քարտի ստացման հետ կապված մանրամասների համար այցելեք Սոցիալական ապահովության վարչության http://www.ssa.gov կայքը:
Մեկնում ԱՄՆ-ից
Մուտքի ներգաղթային արտոնագրով ԱՄՆ մուտք գործելու դեպքում ակնկալվում է, որ դուք մշտապես բնակվելու եք ԱՄՆ-ում, սակայն Ձեր գրին քարտով դուք կարող եք գնալ ԱՄՆ-ից ու նորից վերադառնալ ինչքան կամենաք: Ներգաղթային օրենքները չխախտելու համար խորհուրդ է տրվում տարվա ընթացքում առնվազն վեց ամիս անցկացնել ԱՄՆ-ում: Տարվա ընթացքում վեց ամսից ավել ԱՄՆ-ից դուրս գտնվելը կարող է ներգաղթողի Ձեր կարգավիճակի վրա բացասաբար անդրադառնալ ու խոչընդոտներ ստեղծել հպատակագրման գործընթացի միջոցով քաղաքացիության ստացման հարցում: Մեկ տարուց ավել ԱՄՆ-ից դուրս գտնվելու դեպքում ներգաղթողը կարող է կորցնել մշտական օրինական բնակչի կարգավիճակը, նույնիսկ այն պարագայում, երբ գրին քարտը դեռ գործողության մեջ է:
Եթե գիտեք, որ երկար ժամանակ չեք լինելու ԱՄՆ-ում, ապա կարող եք լրացնել ճամփորդական փաստաթղթի I-131 “Application for Travel Document” դիմումը, որով ԱՄՆՆՔԾ-ի կողմից տրվում է վերստին մուտք գործելու կամ ժամանակավորապես բացակայելու թույլտվություն, ինչի առկայության դեպքում դուք ԱՄՆ-ից բացակայելով չեք վտանգի մշտական օրինական բնակչի Ձեր կարգավիճակը: Վերստին մուտք գործելու թույլտվություն ստանալու համար ԱՄՆՆՔԾ-ին պետք է դիմել նախքան արտերկիր ուղևորվելը: I-131 ձևը գտնելու ու ընթացքի մանրամասներին ծանոթանալու համար այցելեք ԱՄՆՆՔԾ-ի կայքը http://www.uscis.gov (Home > Immigration Forms > Form I-131): Խնդրում ենք նկատի ունենալ, որ Միացյալ Նահանգներից երկարաժամկետ բացակայությունը կանդրադառնա Ձեր` հպատակագրման և ԱՄՆ քաղաքացիության համար որակավորված լինելու ժամկետին:
Կարգավիճակի փոփոխում
Եթե ԱՄՆ մուտք եք գործում պայմանական կագավիճակով` ունենալով CR1 կամ CR2 տեսակի մուտքի արտոնագիր, ապա որոշ ժամանակ անց ԱՄՆՆՔԾ-ում պետք է փոխել ներգաղթային Ձեր կարգավիճակը: Դուք պետք է դիմեք ԱՄՆՆՔԾ-ի Ձեր տեղական գրասենյակ կամ այցելեք http://www.uscis.gov կայքը` պարզելու, թե պայմանական բնակության կարգավիճակն ինչպես պետք է փոխել: Պայմանական կարգավիճակը փոխելու համար ժամանակին չդիմելը կարող է հանգեցնել Ձեր օրինական մշտական բնակչի կարգավիճակի կորստին ու նաև ԱՄՆ-ում ոչ օրինական հիմքերով գտնվելու ժամանակահատվածի կուտակման, որը կարող է հանգեցնել արտաքսման:
Լրացուցիչ տեղեկություններ
ԱՄՆ ներգաղթի և քաղաքացիության ծառայությունը Միացյալ Նահանգներում ներգաղթային հարցերով պատասխանատու մարմինն է: Լրացուցիչ տեղեկությունների համար այցելեք վերջինիս http://www.uscis.gov կայքը կամ Միացյալ Նահանգներում Ձեր նոր բնակության վայրի ԱՄՆՆՔԾ-ի մոտակա գրասենյակ: ԱՄՆՆՔԾ-ի կայքում զետեղված է նաև գործնական տեղեկություններ պարունակող համակողմանի տեղեկագիր, որը կօգնի ներգաղթողներին ներգրավվել ամերիկյան կյանքի առօրյային, ինչպես նաև ծանոթանալ կառավարման ամերիկյան համակարգին ու հիմնական քաղաքացիական նորմերին: Այս և այլ մանրամասների համար այցելեք http://www.uscis.gov (Home > Education & Resources > Resources for New Immigrants):
Բարի գալուստ Ամերիկայի Միացյալ Նահանգներ:
|
