Տեղեկություններ որդեգրման մասին

Որդեգրման ընթացակարգերն ըստ Հաագայի կոնվենցիայի

Միացյալ Նահանգներն ու Հայաստանը երկուսն էլ միացել են Որդեգրման մասին Հաագային կոնվենցիային: Ըստ կոնվենցիայի որդեգրման որոշ ծառայություններ կոնվենցիայի շրջանակում իրականացվող որդեգրումների հետ կապված իրավասու են իրականացնել միայն դաշնային մակարդակում հավատարմագրված որոշակի կառույցներ: Երբ երեխա է որդեգրվում կոնվենցիայի մասնակից որևէ երկրից, ապա որդեգրող ծնողները գիտեն, որ իրենց սպասարկող գերատեսչությունը պետք է ունենա հավատարմագրում` ԱՄՆ պետդեպարտամենտի կողմից նախանշված հավատարմագրող կառույցների կողմից: Այդ կառույցները արհեստավարժության ու էթիկայի նորմերին համահունչ գործունեությունը երաշխավորող միասնական չափանիշների համաձայն գնահատում են ծառայություն մատուցող կազմակերպություններին: Հաագայի կոնվենցիայի հետ կապված մանրամասների համար տես` http://adoption.state.gov/hague/overview.html.

Որոշակի օրենքներից ու կանոնակարգերից ելնելով հյուպատոսական բաժինը չի կարող երաշխավորել որդեգրման ծառայություն մատուցող որևէ կազմակերպության: Որդեգրող ծնողներին խորհուրդ է տրվում որդեգրման ծառայություններից օգտվելուց առաջ լիակատար ուսումնասիրություն կատարել ծառայություն մատուցողի վերաբերյալ: ԱՄՆ-ում գրանցված կառույցների համար որդեգրող ծնողները կարող են դիմել Better Business Bureau-ին և/կամ տվյալ նահանգի լիցենզավորող մարմնին: Նաև կարող եք բացել ԱՄՆ պետդեպարտամենտի հյուպատոսական գործերի վարչության` "Working with an Agency" էջը http://adoption.state.gov կայքում:

Որդեգրման հարցերով Հաագայի կոնվենցիայի նպատակով ԱՄՆ կենտրոնական մարմին է հանդիսանում ԱՄՆ պետդեպարտամենտի` երեխաների հարցերով գրասենյակը` մայրաքաղաք Վաշինգտոնում: Կենտրոնական մարմինը կոնվենցիայով սահմանված կարգով հետևում ու զբաղվում է որդեգրման ծառայություններ մատուցողների առնչությամբ ներկայացված բողոքներին Հաագայի կոնվենցիայի բողոքարկումների ռեգիստրի միջոցով, տես` http://adoptionusca.state.gov/HCRWeb/WelcomeForm.aspx: Նրանք, ովքեր ցանկանում են իրենց մտահոգությունները հայտնել որդեգրման ծառայություններ մատուցողների վերաբերյալ, կարող են դա անել այցելելով վերը նշված էջը: Ձեր բողոքներով կանցկացվի հետաքննություն` ըստ կոնվենցիայով սահմանված կարգի:

Հայաստանին առնչվող տեղեկություններ

Հայաստանից որդեգրում կատարելու վերաբերյալ մանրամասներին ծանոթանալու համար այցելեք Հայաստանի մասին տեղեկություններ ապահովող էջը http://adoption.state.gov/country/armenia.html.

Պայմանավորվածություն որդեգրվողի մուտքի արտոնագրի դիմումի ու հարցազրույցի ժամկետների վերաբերյալ

ԱՄՆ քաղաքացիներին, ովքեր գալիս են Հայաստան երեխա որդեգրելու հետ կապված աշխատանքները ավարտին հասցնելու համար, խորհուրդ է տրվում մուտքի ներգաղթային արտոնագրերի բաժնին IVYerevan@state.gov էլեկտրոնային փոստի հասցեով ուղարկել գրություն, որպեսզի պայմանավորվածություն ձեռք բերվի արտոնագրի դիմումի ներկայացման ու հարցազրույցի ժամկետների վերաբերյալ: Ընդհանուր առմամբ դիմումների ձևակերպման աշխատանքները կատարվում են երկուշաբթի օրերին ժամը 14:00-17:00 սահմաններում, իսկ հարցազրույցը նշանակվում է հաջորդ օրը: Որդեգրողների հետ միասին հարցազրույցին պետք է ներկայանան որդեգրվող երեխան և տեղում որդեգրման հարցերով զբաղվողը: Սովորաբար որդեգրվող երեխաների մուտքի արտոնագիրը տրամադրվում է հենց հարցազրույցի օրը, սակայն երբեմն լինում են բացառություններ: Ուստի որդեգրող ծնողներին խորհուրդ է տրվում ուղևորություն չնախատեսել անմիջապես հարցազրույցին հաջորդող օրը, քանի որ հնարավոր են անսպասելի ձգձգումներ մուտքի արտոնագրի տրամադրման հարցում` կապված տեխնիկական պրոբլեմների կամ ճշգրտման կարիք ունեցող հարցերի առկայությամբ, ինչպիսին օրինակ կարող է լինել որդեգրվող երեխայի լիակատար համապատասխանությունը “ծնողազուրկի” սահմանմանը` ըստ ամերիկյան օրենքների: